Արդահան

Քաջաց քաղաք, քաջաց բերդ, Քաջատուն: Քաղաք է Մեծ Հայքի Գուգարք աշխարհի Արդահան գավառում, հետագայում` Կարսի մարզի Արդահանի օկրուգում, մի լայնատարած դաշտի մոտ, բարձրաբերձ լեռների ստորոտում, մոտ 1800 մ բարձրության վրա: Ունի լեռնային ցուրտ կլիմա, ձմեռը տևում է 7-8 ամիս: Հարավային մասում կաղնու անտառներ են:
Առևտրական հանգույց էր IX-XI դդ. արաբական խալի‎ֆայության երկրների և Մերձսևծովյան երկրամասերի միջև: XI դ. Արդահանի բերդը գրավվել է վրացիների կողմից, 1236թ.` թաթար-մոնղոլների կողմից, XVI դ. Սուլեյման I-ի ժամանակ անցնում է Թուրքիային: 1828 թ. ռուսական զորքերը ազատեցին բերդը թուրքերից: 1920 թ., երբ Արդահանը գրավվեց թուրքերի կողմից, հայ բնակչությունը գաղթեց Արևելյան Հայաստան և Վրաստան: Այժմ այն գավառական փոքրիկ քաղաք է: